Kolumne
Wenn dat Weder mitspeelt, köönt wi uns erste Radtour maken. Bi nattkoolt Weder mit klammen Hannen un natte Knee bringt dat keen Spaß! Ick mütt jümmers een Anlooppunkt hebben un dat is merstens bi‘n Kröger, wo denn ok de Wennpunkt is. Denn kannt je los gahn. Mit egen Kraft in de Pedale petten, de Been as’n Kolbenmotor in’n Gang holen.
Toerst beten suutje angahn laten. Vagels jubiliert, Rehwild steit up grööne Wischen. Bargup is in de hütige Tiet keen Problem mehr, watao hett man denn över twintig Gäng odder sogor een Pedeles mit’n Motor. Bi’n Kröger ankamen ward sick verpuust, wat drunken un wat eten. Wenn dennoch de Christophoros, de Patron vun uns Radfohres en Gauden hett un up den Trüchwech den Wind vun achtern pusten lött, denn bring dat besünners veel Spaß.
Is lang her, dor hett de domalige Wirtschftsminister Ludwig Ehrhardt,den gröönen Plan in’t Leven ropen. De Plan hett nich blots de Buurn gaudes bröcht, ok för uns Radfohrers is dat ne fiene Saak. Up Asphalt dwars dörch de Feldmark, kannst diene Riepen singen hörn. Hest dat Geföhl „im Zeichen der Berwegungsarmut“ wat för diene Gesundheit to daun.Amenn sogor dien Jugend to verlängern. Babentau sporst ok noch Geld för Benzin un schoonst dat Ozonlock. Wokeen enmal Kedenfett leckt hett, ward jümmers wedder up de Drahtesel stiegen. Bruuks keene Mackers wi bi’t Tennis odder Fautball . Un noch wat mütt man de Radfohres hoch anreken. Se hebbt noch ni nich Rehe, Hasen, Swienegels odder Poggen doot föhrt.Höchst Mal ut Verseihn ne Mügg versluukt.
Na, wat meenst,wist nich ok dien Drahtesel kloor maken?
Sonny!
Sonny Holst hat es sich zur Aufgabe gemacht, das plattdeutsche Kulturgut zu pflegen und zu fördern. Vierzehntägig erscheint ab jetzt seine Plattdeutsche Kolumne auf bargteheideAktuell.
